హైదరాబాద్లో ట్రాఫిక్ డీకంజెషన్ కోసం మరో మెగా ఇన్ఫ్రాస్ట్రక్చర్ ప్రాజెక్ట్కు రంగం సిద్ధమవుతోంది. నగర నడిబొడ్డున నిత్యం ట్రాఫిక్ ఒత్తిడితో సతమతమవుతున్న నాంపల్లి-అసెంబ్లీ-లక్డీకాపూల్ కారిడార్కు ప్రత్యామ్నాయంగా అత్యాధునిక వై-షేప్ ఫ్లైఓవర్ను నిర్మించేందుకు అధికారులు ప్రణాళికలు రూపొందిస్తున్నారు. దాదాపు 1.5 కిలోమీటర్ల పొడవుతో పబ్లిక్ గార్డెన్ నుంచి లక్డీకాపూల్ వరకు ఈ ఎలివేటెడ్ కారిడార్ విస్తరించనుంది. లక్డీకాపూల్ వద్దకు చేరుకున్న తర్వాత ఫ్లైఓవర్ రెండు దిశల్లో విడిపోయి మాసబ్ట్యాంక్, ఖైరతాబాద్ మార్గాలకు కనెక్టివిటీ కల్పించేలా Y ఆకారంలో డిజైన్ చేస్తున్నారు.
కోర్ సిటీ ట్రాఫిక్కు స్మార్ట్ సొల్యూషన్
నాంపల్లి నుంచి అసెంబ్లీ మీదుగా లక్డీకాపూల్ చేరే మార్గం హైదరాబాద్లో అత్యంత రద్దీ కారిడార్లలో ఒకటి. రాష్ట్ర అసెంబ్లీ, ప్రభుత్వ కార్యాలయాలు, రైల్వే స్టేషన్, వాణిజ్య కేంద్రాలు ఈ మార్గంలో ఉండటంతో రోజంతా ట్రాఫిక్ రద్దీ కొనసాగుతోంది. అసెంబ్లీ సమావేశాల సమయంలో ట్రాఫిక్ డైవర్షన్లు అమల్లోకి వస్తే పరిస్థితి మరింత క్లిష్టంగా మారుతోంది. ఈ నేపథ్యంలో కీలక జంక్షన్లపై ట్రాఫిక్ ఒత్తిడిని తగ్గించేందుకు హెచ్ఎండీఏ ఈ ప్రాజెక్టును ప్రతిపాదించినట్లు తెలుస్తోంది.
భూసేకరణ లేకుండానే నిర్మాణం..
ఈ ప్రాజెక్ట్లో మరో విశేషం ఏమిటంటే... దాదాపు పూర్తిగా ప్రభుత్వ భూములపైనే నిర్మాణం చేపట్టేలా డిజైన్ సిద్ధమవుతోంది. ప్రైవేట్ ఆస్తుల సేకరణ వల్ల తలెత్తే న్యాయపరమైన వివాదాలు, ఆలస్యాలను నివారించేందుకు 99 శాతం వరకు భూసేకరణ అవసరం లేకుండా ప్రణాళికలు రూపొందిస్తున్నట్లు సమాచారం. ఇందుకోసం అవసరమైన ఫీల్డ్ సర్వేలను కూడా అధికారులు పూర్తి చేసినట్లు తెలుస్తోంది.
రూట్ మ్యాప్ ఎలా ఉండబోతోంది?
తెలుగు యూనివర్సిటీ సమీపం నుంచి ప్రారంభమయ్యే ఫ్లైఓవర్ పబ్లిక్ గార్డెన్ మీదుగా అసెంబ్లీ వెనుక భాగం నుంచి రైల్వే ట్రాక్ వెంట లక్డీకాపూల్ చేరుతుంది. అక్కడి నుంచి ఒక బ్రాంచ్ మాసబ్ట్యాంక్ వైపు, మరో బ్రాంచ్ ఖైరతాబాద్ వైపు వెళ్లేలా అనుసంధానం కల్పిస్తారు. నాంపల్లి వైపు నుంచి వచ్చే వాహనాలు నేరుగా ఖైరతాబాద్ లేదా మాసబ్ట్యాంక్ చేరుకునేలా ఈ ఎలివేటెడ్ కారిడార్ ఉపయోగపడనుంది. ట్రాఫిక్ నిర్వహణ దృష్ట్యా ఫ్లైఓవర్ను ప్రధానంగా వన్వే కారిడార్గా వినియోగించే అవకాశాలపై కూడా అధికారులు పరిశీలిస్తున్నారు.
హైదరాబాద్కు మరో సిగ్నేచర్ ఫ్లైఓవర్?
స్ట్రాటజిక్ రోడ్ డెవలప్మెంట్ ప్రోగ్రామ్ (SRDP)లో భాగంగా ఇప్పటికే పలు ఫ్లైఓవర్లు, అండర్పాస్లు నగర ట్రాఫిక్ను గణనీయంగా తగ్గించగా... ఇప్పుడు ప్రతిపాదిత వై-కనెక్టర్ ఫ్లైఓవర్ కోర్ సిటీ ట్రాఫిక్కు గేమ్ ఛేంజర్గా మారుతుందా అన్నది ఆసక్తికరంగా మారింది.